ಆದಿಯೊಳಗ ಎಲ್ಲಾ ಕಡಿಗೆ ಬರೇ ನೀರಿತ್ತು. ಸಮುದ್ರ ನೆಲಾನ ನುಂಗಿಬಿಟ್ಟಿತ್ತು. ತಿಳಿ ನೀಲಿ ಆಕಾಶ. ಮತ್ತ ಕಡು ನೀಲಿ ಸಮುದ್ರ. ಎಲ್ಲಾ ಕಡೇ ನೀಲಿನs ನೀಲಿ.
ಪೂರ್ವಕ್ಕ ಆಕಾಶ ಸಮುದ್ರ ಒಂದಾಗುವಲ್ಲೆ ಬೆಳ್ಳಗಿನ ಬೆಳಕಿನ್ಯಾಂಗ ಬೆಳಗವ್ವನ ಮನೀ. ಪಶ್ಚಿಮಕ್ಕ ಆಕಾಶ ಸಮುದ್ರ ಒಂದಾಗುವಲ್ಲೆ ಸಂಜೀಗೆಂಪಿನ್ಯಾಂಗ ಕೆಂಪವ್ವನ ಮನೀ. ಸಮುದ್ರದ ನಟ್ಟ ನಡಬರಕ ನೀರಾಗ ಬಣ್ಣಬಣ್ಣದ ಮನಸಿನ ಮಾಯವ್ವನ ಮನೀ. ಬೆಳಗವ್ವನ ಮನೀ ಅಂಗಳದಾಗ ಸಾರಿಸಿದ ನೆಲದ ಮ್ಯಾಲೆ ಬಿಳಿ ರಂಗೋಲಿ. ಕೆಂಪವ್ವನ ಮನೀ ಅಂಗಳದಾಗ ನುಣ್ಣಗಿನ ಕಲ್ಲಿನ ಮ್ಯಾಲೆ ನಕ್ಷತ್ರಗೋಳ ರಂಗೋಲಿ. ಮಾಯವ್ವನ ಮನೀ ಅಂಗಳದಾಗ ಬಣ್ಣಬಣ್ಣದ ಖಡುವಿನಿಂದ ಬರದ ರಂಗೋಲಿ.
ಬೆಳಗವ್ವನ ಮನೀ ಹಿತ್ತಲದಾಗ ಹಗ್ಗದ ಮ್ಯಾಲೆ ಒಂದು ಬಿಳೀ ಧೋತ್ರಾ ಇರತಿತ್ತು. ಅದರ ಬಾಜೂಕ ಹಳದಿ ಪಗಡೀ ವಸ್ತ್ರಾ. ದಿನಾ ನಶೀಕಿನ್ಯಾಗ ಆಕಾಶದಾಗ ಚಿಕ್ಕಿ ಮಂದ ಆಗೂ ಹೊತ್ತಿಗೆ ಸೂರ್ಯಾ ಬೆಳಗವ್ವನ ಮನೀ ಹಿತ್ತಲದಾಗಿನ ಕಿಂಡಿಯೊಳಗಿಂದ ಮ್ಯಾಲೆ ಬರತಿದ್ದ. ಸಮುದ್ರ ಸ್ನಾನಾ ಮಾಡಿ ಹಿತ್ತಲದಾಗಿನ ಬಿಳೇ ಧೋತ್ರಾ ಉಟಗೊಂಡು ಹಳದೀ ಪಗಡೀ ತಲೀಮ್ಯಾಲೆ ಇಟಗೊಂಡು ಬೆಳಗವ್ವನ ಜೋಡಿ ಸ್ವಲ್ಪ ಅದೂ ಇದೂ ಮಾತಾಡಿ ಆಕಾಶ ಏರತಿದ್ದ.
ಸೂರ್ಯಾನ ನಡಿಗಿ ದೃಷ್ಟಿ ಸೀದಾ ಪಶ್ಚಿಮದ ಕಡೀಗೆ. ಅವಂಗ ಒಂದs ಹಾದಿ. ಅಂವಾ ಹೋಗೋಮುಂದ ಸಮುದ್ರದ ತೆರಿ ಎತ್ತರ ಆಕಾಶಕ್ಕ ಏರತಿದ್ದು. ಕ್ಯಾಕೀ ಹೊಡಿತಿದ್ದು. ನೆಲಾ ಕಾಲತಳಗ ತುಳಿದ ಸೊಕ್ಕು ಅವಕ್ಕ.. ಬಾರಲೇ ಆಟಾ ಆಡೋಣು ಅಂತ ಸೂರ್ಯಾನ್ನ ಕರೀತಿದ್ದು. ಸೂರ್ಯಾ ಬರೇ ನಗತಿದ್ದ. ನಿಮ್ಮ ಆಟಾ ನಿಮಗ ನನ್ನ ಆಟಾ ನನಗ ಅಂತ ಹೇಳಿ ಮುಂದ ಹೋಗತಿದ್ದ.
ಸಂಜೀ ಹೊತ್ತಿಗೆ ಸೂರ್ಯಾ ಕೆಂಪವ್ವನ ಮನೀ ಹಿತ್ತಲದಾಗ ಇಳೀತಿದ್ದ. ಕೆಂಪವ್ವನ ಮನೀ ಹಿತ್ತಲದಾಗ ಹಗ್ಗದ ಮ್ಯಾಲೆ ಒಂದು ಕೆಂಪಗಿನ ಧೋತ್ರಾ. ಅದರ ಬಾಜೂಕ ಒಂದು ದಟ್ಟ ನೀಲಿ ಪಗಡಿ ವಸ್ತ್ರಾ. ಸೂರ್ಯಾ ಸಮುದ್ರದಾಗ ಸ್ನಾನಾ ಮಾಡಿ ಹಿತ್ತಲದಾಗಿನ ಕೆಂಪು ಧೋತ್ರಾ ಉಟಗೊಂಡು ತಲೀಗೆ ದಟ್ಟ ನೀಲಿ ಪಗಡೀ ಇಟಗೊಂತಿದ್ದ. ಕೆಂಪವ್ವ ಅವಂಗ ಬೆಲ್ಲಾ ನೀರು ಕೊಡತಿದ್ದಳು. ಬೆಲ್ಲಾ ತಿಂದು ನೀರು ಕುಡುದು ಸೂರ್ಯಾ ಕೆಂಪವ್ವನ ಮನೀ ಹಿತ್ತಲದಾಗಿಂದ ಸಮುದ್ರದ ಆಳಕ್ಕ ಮುಳುಗತಿದ್ದಾ.
ನಡು ರಾತ್ರ್ಯಾಗ ಮಾಯವ್ವನ ಮನೀ ಹಿತ್ತಲದಾಗ ನಿಂತು ಹೋಗತಿದ್ದಿರಬಹುದೋ ಏನೋ. ಆದ್ರ ಮಾಯವ್ವ ಭಾಳ ನಿದ್ದಿಬಡಕಿ. ಕಣ್ಣು ಮುಚ್ಚಿದರ ಕಲ್ಲಿನ ಗೊಂಬಿ.
ಹೀಂಗ ದಿನಾ ಕಳದು ವಾರಾತು. ವಾರ ಕಳದು ತಿಂಗಳಾತು. ತಿಂಗಳು ಕಳದು ವರ್ಷಾದ್ವು. ಒಂದು ಯುಗಾ ಕಳದು ಮತ್ತೊಂದು ಬಂತು. ಇನ್ನೊಂದು ಬಂತು. ಸೂರ್ಯಾ ಸಮುದ್ರದ ನೆತ್ತಿಮ್ಯಾಲೆ ನಡದು ನಡದು ತೆರಿ ಬತ್ತಿಸಿದಾ. ನೀರು ಬತ್ತಿಸಿದಾ. ನೀರು ಮಾಡಾತು. ಮುಗಿಲಿಗೆ ಏರಿತು. ನೆಲಾ ಮ್ಯಾಲೆ ಬಂತು. ಮಾಯವ್ವನ ಮನೀ ಸುತ್ತಲೂ ಬಯಲಾತು.ಸಮುದ್ರ ಬೆಳಗವ್ವ ಮತ್ತ ಕೆಂಪವ್ವನ ಮನೀ ಬಾಗಿಲತನಕಾನ ಉಳೀತು.
ಮಾಯವ್ವ ಮನೀ ಹೊರಗ ಬಂದ್ಲು. ಸುತ್ತಲೂ ಇದ್ದ ಮಣ್ಣಿನ ನೆಲಾ ಕಲ್ಲಿನ ಗುಡ್ಡಾ ನೋಡಿದ್ಲು.ಮುಗಲಾಗಿನ ಮಾಡ ನೋಡಿದ್ಲು. ಮಾಯವ್ವನ ದೃಷ್ಟಿಗೆ ಮಾಡ ಕಪ್ಪಗಾದ್ವು . ಧೋ ಧೋ ಅಂತ ನೀರಾಗಿ ನೆಲಕ್ಕ ಸುರದ್ವು. ಮತ್ತ ಹೋಗಿ ಸಮುದ್ರ ಸೇರಿಕೊಂಡ್ವು. ಒದ್ದಿ ನೆಲದ ಮ್ಯಾಲೆ ಮಾಯವ್ವ ಹೀಂಗ ಸೆರಗ ಬೀಸಿದ್ಲು . ನೆಲಾ ಎಲ್ಲಾ ಹಸಿರಾತು. ನೆಲದ ಮ್ಯಾಲೆ ಗಿಡಾ ಹುಟ್ಟಿದ್ವು. ಬಳ್ಳಿ ಹುಟ್ಟಿದ್ವು. ಗಿಡಾ ಬೆಳದು ಮುಗಿಲು ಮುಟ್ಟಿದ್ವು. ಗಿಡಾ ಗಿಡಾ ಕೂಡಿ ಕಾಡು ಆತು. ಬಳ್ಳಿ ಗಿಡಕ್ಕ ಸುತಿಗೊಂಡ್ವು. ಬಣಬಣ್ಣದ ಹೂ ಬಿಟ್ವು. ಎಲ್ಲಾ ಕಡೆ ಏಳು ಬಣ್ಣಾ ಸುರುದ್ವು.
ಇಷ್ಟೆಲ್ಲಾ ಅದ್ರೂ ಬೆಳಗವ್ವಗ ಮನಿಸ್ಸಿನ್ಯಾಗ ಏನೋ ಬರೋಬರಿ ಇಲ್ಲಾ ಅನಿಸತಿತ್ತು. . ಒಂದಿನಾ ಆಕೀ ಸೂರ್ಯಾನ ಕೂಡ ಕೆಂಪವ್ವಗ ಭೆಟ್ಟಿಗೆ ಬಾ ಆಂತ ಹೇಳಿ ಕಳಿಸಿದ್ಲು. ಕೆಂಪವ್ವ ಮರುದಿನಾ ಕಾಮನ ಬಿಲ್ಲು ಏರಿದ್ಲು.ಸೂರ್ಯಾ ಇಕಡಿಂದ ಅಕಡೆ ಹೋಗೂದರಾಗ ಬೆಳಗವ್ವನ ಮನೀ ಬಾಗಿಲದಾಗ ಬಂದು ನಿಂತ್ಲು. ಇಬ್ಬರೂ ಮನಸ್ಸಿನ್ಯಾಗಿನ ಮಾತು ಹಂಚಿಗೊಂಡರು. ಆದಿ ಇಂದ ಈಗಿನ ತನಕಾದ ಮಾತು. ಕಡೀಕ ಬೆಳಗವ್ವ “ಇಷ್ಟೆಲ್ಲ ಆದ್ರೂ ಏನೋ ಇಲ್ಲ ಅಂತ ಅನಸ್ತದ ನೋಡss “ ಅಂತ ಬೆಳಗವ್ವ ಕೆಂಪವ್ವನ ಹತ್ರ ಹೇಳ್ಕೊಂಡಳು.
ಮರುದಿನಾ ಕೆಂಪವ್ವ ಒಂದು ಮಣ್ಣಿನ ಹಕ್ಕಿ ಮಾಡಿದ್ಲು. ಬೆಳಗವ್ವ ಮನ್ಯಾನ ಕುಂಚಿಗಿ ತಗೊಂಡು ಬಂದ್ಲು. ಹಸಿರು ಕುಂಚಿಗೀಗೆ ಕೆಂಪು ಬಣ್ಣದ ಅಂಚು. ಇಬ್ಬರೂ ಕುಂಚಿಗ್ಯಾಗ ಕೈ ಆಡಿಸಿ ಅದನ್ನ ಮಣ್ಣಿನ ಹಕ್ಕಿ ಮ್ಯಾಲೆ ಇಟ್ಟರು. ಸ್ವಲ್ಪ ಹೊತ್ತಾದ ಮ್ಯಾಲೆ ಕುಂಚಿಗೀ ಅಳಗ್ಯಾಡಿತು. ಜೀವಾ ತುಂಬಿದ ಗಿಳಿ ಕುಂಚಿ ಒಳಗಿಂದ ಹೊರಗ ಬಂತು. “ನನ್ನ್ಯಾಕ ಇಷ್ಟು ಗಡಿಬಿಡೀಲೆ ಕರಿದ್ರಿ?” ಅಂತ ಕೇಳ್ತು. ಕೆಂಪವ್ವ “ನೀ ನೆಲದ ಮ್ಯಾಲೆ ಎಲ್ಲಾ ಕಡೇ ಸುತ್ತಿ ಬಾ. ಬಂದು ಏನು ನೋಡಿದಿ ಅಂತ ಹೇಳು “ ಅಂತ ಗಿ ಳಿ ಮುಗಿಲಿಗೆ ಹಾ ರಿಸಿದ್ಲು.
ಸಂಜೀಕ ಗಿಳಿ ತಿರುಗಿ ಬಂತು. ಬೆಳಗವ್ವನ ಅಂಗಳದಾಗಿನ ಕುಂಬೀ ಮ್ಯಾಲೆ ಕೂತು “ಬಿಳೀ ಮುಗಿಲು ಸುತ್ತಿದೆ, ಕಾಡಿನ ನೆತ್ತಿ ಮ್ಯಾಲೆ ಹಾರಿದೆ, . ಗಿಡದ ಟೊಂಗಿ ಮ್ಯಾಲೆ ಕೂತೆ, ಪೇರು ಹಣ್ಣು ಎಂಜಲಾ ಮಾಡಿದೆ.ನೆಲಾ ಮುಟ್ಟಿ ದೆ. ಬಣ್ಣಬಣ್ಣದ ಹೂ ನೋಡಿದೆ, ತಿಳೀ ನೀರು ಕುಡಿದೆ. ಎಲ್ಲಾ ಛಂದ ಇತ್ತು. ಆದ್ರ ಇದss ಇರಲಿಲ್ಲ.” ಆಂತ್ಯು. “ಇದ ss ಅಂದ್ರ ಯಾವದು?” ಆಂತ ಕೆಂಪವ್ವ ಕೇಳಿದ್ಲು. “ಅಂದ್ರ ಮಾತು ಹಂಚಿಗೊಳ್ಳಲಿಕ್ಕೆ ಒಂದೂ ಜೀವಾನs ಇರಲಿಲ್ಲ.” ಬೆಳಗವ್ವ ಕೆಂಪವ್ವ ಇಬ್ಬರೂ ಮೆಲ್ಲಗ ನಕ್ಕರು.
ಮರುದಿನಾ ಬೆಳಗವ್ವ ಕೆಂಪು ಮಣ್ಣಿನಿಂದ ಒಂದಿಷ್ಟು ಹೆಣ್ಣಿನ ಗೊಂಬೀ ಮಾಡಿದ್ಲು.ಹೆಣ್ಣಿಗೊಂದು ಜೋಡು ಬ್ಯಾಡೇನ ಅಂತ ಕೆಂಪವ್ವ ಅದೇ ಮಣ್ಣಿಂದ ಅಷ್ಟೇ ಗಂಡಿನ ಗೊಂಬೀ ಮಾಡಿದ್ಲು. ಗೊಂಬೀ ಕಣ್ಣೀಗೆ ಕರೀ ಕಾಡಿಗಿ ಇಟ್ಟರು. ಗೊಂಬಿಗೋಳ ಮ್ಯಾಲೇ ರೇಷ್ಮೀ ವಸ್ತ್ರಾ ಹೊಚ್ಚಿದರು. ಹಾಂ ಹಾಂ ಅನ್ನೂದರಾಗ ಗೊಂಬಿ ಎಲ್ಲಾ ಜೀವಂತ ಆದ್ವು. ಇಬ್ಬರೂ ಅವಕ್ಕ ಭಾಷಾ ಕಲಿಸಿದ್ರು, ಉಡಿಗಿ ತೊಡಿಗಿ, ಹಾಡು, ಕುಣಿತಾ, ರೀತಿ, ಪದ್ಧತಿ ಎಲ್ಲಾ ಕಲಿಸಿದ್ರು. ನಿಮ್ಮ ಎಲ್ಲಾರದ್ದೊಂದು ಪಂಗಡ ಅಂದ್ರು. ನೀವು ಪೂರ್ವಕ್ಕ ಹೋಗಿ ಸಮಾಧಾನದಿಂದ ಸಂತೋಷದಿಂದ ಇರ್ರಿ ಅಂತ ಕಳಿಸಿಕೊಟ್ರು.
ಹೀಂಗ ದಿನಾ ಒಂದೊಂದು ಪಂಗಡ ಹುಟ್ಟಿಸಿದ್ರು. ಯಾವಾಗಲೂ ಒಂದು ಗಂಡಿಗೆ ಒಂದು ಹೆಣ್ಣು ಮಾಡೂದನ್ನ ಮರೀಲಿಲ್ಲ. ಎಲ್ಲಾರಿಗೂ ಅವರದ್ದ ಭಾಷಾ, ಉಡಿಗಿ, ತೊಡಿಗಿ, ಹಾಡು, ಕುಣಿತಾ, ರೀತಿ, ಪದ್ಧತಿ ಕಲಿಸಿದ್ರು. ಭೂಮಿಮ್ಯಾಲೆ ನಿಮ್ಮದ ಜಾಗಾ ಮಾಡಿ ಬ್ಯಾರೆ ಪಂಗಡಗೋಳ ಜೋಡಿ ಹೊಂದಿಕೊಂಡು ಹೋಗ್ರಿ ಅಂತ ಕಳಿಸಿಕೊಟ್ರು. ಸ್ವಲ್ಪ ದಿನಾ ಆದಮ್ಯಾಲೆ ಇನ್ನ ಸಾಕಂತ ಕೆಂಪವ್ವ ಮನೀಗಿ ಹೊಂಟು ನಿಂತ್ಲು. ಹೋಗಿ ಬಾ ಅಂತ ಕಾಮನ ಬಿಲ್ಲಿಗೆ ಆನಿಸಿ ನಿಂತು ಬೆಳಗವ್ವ ಕೆಂಪವ್ವನ್ನ ಬೀಳ್ಕೊಟ್ಲು.
ಇದನ್ನ ನೋಡಿ ಮಾಯವ್ವ ಲಟಿಗಿ ಮುರುದ್ಲು. ನನಗೂ ಇದನ್ನ ಮಾಡ್ಲಿಕ್ಕೆ ಬರವಲ್ಲದೇನು ಅಂತ ಹಟಕ್ಕ ಬಿದ್ಲು. ಮುಂಜಾನೆದ್ದು ಒಂದಿನಾ ಬಿಳೇ ಮಣ್ಣಿನಿಂದ ಒಂದಿಷ್ಟು ಗಂಡಿನ ಗೊಂಬಿ ಮಾಡಿದ್ಲು. ಅದ s ಮಣ್ಣಿಂದ ಒಂದಿಷ್ಟು ಹೆಣ್ಣಿನ ಗೊಂಬಿ ಮಾಡಿದ್ಲು.ಎಲ್ಲಾ ಗೊಂಬೀಗೂ ಕಣ್ಣೀಗೆ ನೀಲಿ ಬಣ್ಣಾ ಹಚ್ಚಿದ್ಲು. ಮನ್ಯಾಗಿನ ಬಣಬಣ್ಣದ ಕೌದೀ ತಂದು ಅವುಗಳ ಮ್ಯಾಲೆ ಹೊದಿಸಿದ್ಲು. ಹೀಂಗ ಹೋಗಿ ಹಾಂಗ ಬರೂದರಾಗ ಎಲ್ಲಾ ಗೊಂಬೀಗೂ ಜೀವ ಬಂದಿತ್ತು. ಅವಕ್ಕ ಭಾಷಾ ಕಲಿಸಿದ್ಲು. ಉಡಿಗಿ ತೊಡಿಗಿ, ಹಾಡು, ಕುಣಿತಾ, ರೀತಿ, ಪದ್ಧತಿ ಎಲ್ಲಾ ಕಲಿಸಿದ್ಲು. ಗಂಡು ಹೆಣ್ಣು ಜೋಡ್ಯಾಗಿ ಜೀವನಾ ಮಾಡ್ರಿ ಅಂತ ಕಳಿಸಿ ಕೊಟ್ಲು. ಒಂದು ಹೆಣ್ಣು ನನಗ ಜೋಡಿ ಸಿಗಲಿಲ್ಲಾ ಅಂತು. ನಾಳೆ ನಿನಗ ಜೋಡಿ ಮಾಡ್ತಿನಿ ನೀ ಈಗ ಹೋಗು ಅಂತ ಒಂಟಿ ಹೆಣ್ಣನ್ನ ಕಳಿಸಿ ಮಾಯವ್ವ ಮಲ್ಕೊಂಡ್ಲು.
ಮರದಿನಾ ಮತ್ತ ಒಂದಿಷ್ಟು ಹೆಣ್ಣು ಮತ್ತ ಗಂಡು ಗೊಂಬಿಗೋಳನ್ನ ಮಾಡಿ ಬಣಬಣ್ಣದ ಕೌದಿ ಹೊದಿಸಿ ಜೀವಾ ತುಂಬಿದ್ಲು.ಅವಕ್ಕ ಬ್ಯಾರೆ ಭಾಷಾ, ಉಡಿಗಿ ತೊಡಿಗಿ, ಹಾಡು, ಕುಣಿತಾ, ರೀತಿ, ಪದ್ಧತಿ ಎಲ್ಲಾ ಕಲಿಸಿದ್ಲು. ಗಂಡು ಹೆಣ್ಣು ಜೋಡ್ಯಾಗಿ ಜೀವನಾ ಮಾಡ್ರಿ ಅಂತ ಕಳಿಸಿ ಕೊಟ್ಲು. ಒಂದು ಗಂಡು ನನಗ ಜೋಡಿಲ್ಲಾ ಅಂತು. ನಿನ್ನ ಜೋಡಿ ಹೆಣ್ಣು ನಿನ್ನೇನೇ ಮಾಡನಿ, ಆಕಿನ್ನ ಹುಡಿಕಿ ಆಕೀ ಜೋಡಿ ಜೀವನಾ ಮಾಡು ಅಂದ್ಲು ಮಾಯವ್ವ. ಹ್ಯಾಂಗ ಹುಡುಕ್ಲಿ ನನಗ ಆ ಮನಸs ಇಲ್ಲಲ್ಲಾ ಅಂತು ಒಂಟಿ ಗಂಡು. ಮಾಯವ್ವ ಅವನ ಮನಸೀಗೆ ಹುಡುಕೋದನ್ನ ಕಲಿಸಿಕೊಟ್ಲು. ಈಗ ಹೋಗಿ ನಿನ್ನ ಹೆಣ್ಣನ್ನ ಹುಡುಕು ಅಂತ ಕಳಿಸಿಕೊಟ್ಲು.
ಒಂಟಿ ಗಂಡು ಹಗಲಿನ್ಯಾಗ ದಿಕ್ಕು ದಿಕ್ಕು ತಿರುಗಿದಾ. ರಾತ್ರಿ ಮುಗಿಲಾಗ ಚಿಕ್ಕಿ ಎಣಿಸಿದಾ. ಮೀನ ಮೇಷ ಅಂತ ಆಕಾರ ಜೋಡಿಸಿದಾ. ಮಂದಿ ಕೇಳಿದಾಗ ಹುಡುಕೋದು ಬಿಡೋದು ನನ್ನ ಮನಸು ಅಂದ. ಕಡೀಕೂ ಒಂಟಿ ಹೆಣ್ಣು ಒಂದಿನಾ ಸಿಕ್ಕಳು. ಇಬ್ಬರೂ ಬ್ಯಾರೆ ಎಲ್ಲಾರ ಹಾಂಗ ಸಂಸಾರ ಹೂಡಿದರು. ಆದ್ರ ಇಬ್ಬರಿಗೂ ಹೊಂದಲಿಲ್ಲ. ಜಗಳಾ ಮಾಡಿ ಗಂಡು ಮತ್ತ ಏನೋ ಹುಡುಕ್ಕೋತ ಮನಿಯಿಂದ ಹೊರಗ ಬಿದ್ದ. ಮತ್ತ ತಿರುಗಿ ಬಂದ. ಮತ್ತ ಜಗಳ ಮತ್ತ ಹೊಂದಾಣಿಕಿ. ಉಳಿದ ಮಂದಿ ಎಲ್ಲಾ ಇವರನ್ನ ನೋಡಿ ನಕ್ಕರು. ಆಟಕ್ಕ ಆಟಂತ ತಾವೂ ಜಗಳಾ ಆಡಿ ನೋಡಿದ್ರು. ಬೇಕನಿಸಿ ಮತ್ತ ಮತ್ತ ಅದ ಆಟಾ ಆಡಿದ್ರು. ದಿನಾ ಕಳದ್ವು, ವಾರ ಕಳದ್ವು. ಜಗಳಾಟಾ, ಹುಡುಕಾಟಾ ಎಲ್ಲಾರಿಗೂ ಅಂಟಿಕೊಂಡ್ತು.ಜಗತ್ತು ಹುಟ್ಟಿತು.
ಮಾಯವ್ವನ ಮಾರೀಮ್ಯಾಲೆ ಸಣ್ಣ ನಗೀ ಮೂಡಿತು. ಈಗ ನೆಲದ ಮ್ಯಾಲೆ ಅವಳದ್ದ s ರಾಜ್ಯ. ಬೆಳಗವ್ವ ಕೆಂಪವ್ವ ಮತ್ತೊಂದಿಷ್ಟು ದೂರ ಸಮುದ್ರದಾಗ ತಮ್ಮ ಮನೀ ಮಾಡ್ಯಾರಂತ.
ಕಥೆಯ ಬಗ್ಗೆ: ಹೋಪಿ ಎಂಬ ಅರಿಜೊನಾದ ಮೂಲನಿವಾಸಿ ಪಂಗಡ ದ ಜನರು ಪ್ರಪಂಚ ಅಸ್ತಿತ್ವಕ್ಕೆ ಬಂದ ಬಗೆಗೆ ಹೇಳುವ ಒಂದು ಕಥೆ ಇದರ ಹಿಂದಿನ ಮೂಲ ಸ್ಫೂರ್ತಿ. ಆದರೆ ಇದು ಆ ಕಥೆಯ ನೇರ ಭಾಷಾಂತರವಲ್ಲ.
ಅಮೂರ್ತ 